الى امي ...
التي نذرت عمرها لكي اكون ..
الى التي لولاها لما كنت او اكون ..
الى كل مااملك بالدنيا ..
جذع بالكاع شجره وبالسمه امي تلوح وفضه غصونها وبالذهب منقوشه
امي لو نعت تذبح حمام الدوح وعلى غصون الاشجار اتشيع اعشوشه
امي اتعنه ليها وضيفهه اتحييك تضمك بالنضر وتحضنك ارموشه
الفجر لو صلت امي اتصلي يمهه نجوم ويمهه مصلى جبرائيل مفروشه
صلاه الام فرق عن كل صلاه اتصير وربك من خلقهه الجنه سواها
امي جسم واحد بس تصلي اثنين لان حتى الخيال ايصلي وياها
وصفحه امي خلقها الباري بالقران كفاها الفاتحه والكرسي ملكاها
يعني اجيسهه امحرم عليك الله شرط تتوضه لازم يله تقراها
وقنوت امي على اجف منكتب قران وعلى اسطور الاصابع نزلت اياته
جفن امي حديقه ارموشهه الاشجار تضل تنزل ورد لو تبجي دمعاته
بكاروك الكلب لولتلي مو عالكاع وماهزتني اديهه اتهزني دكاته
امي النه حديقه وكلنه بيهه انام وبلابل عالغصون اتحط نواعيها
امي البسمله وبكل وكت تنكال ابصلاتي بخوفتي وبوحشتي احجيها
امي احسن عمل ارضيها ارضي الله وامي اكبر ذنب لو ردت ابجيها
امي المااريدن تمشي عني بيوم يبجي البيت لمن تمشي رجيلها
امي اشكد اسمهه ازغير بس عنوان سهله اكتابته وماتكدر اتجزه
واكبالي لو رحت تركض تصير الباب وطلاكاته اديهه والكلب رزه
امي تموت تنشل من يضكنه الجوع وكلهه اتصير نار وجوعنه اتعجزه
عالتنور تركض تخبزنه اتريد على جفهه بعدهي وتستوي الخبزه
وبجيوبي تحط عيونه امي بيوم لو اسافر تكلي اياك تنساني
وحرب وكتي وانه مبتر بلا ذرعان وارداني اتصير وحده ووحده ذرعاني
ومنهن عين امي اتصير وكت الضيج بكل نكله جدم وياها تلكاني
وعين اعله المصلى من اكضي فرض الله بس تفتح اديهه اتصير قراني
مع امنياتي بالتوفيق لكل الامهات بالدنيا ..
الحارث الشويلي
الجمعة يوليو 25, 2008 3:18 am
