وبمناسبه الولاده الطاهره والميمونه للامام المهدي ارواحنا له الفداء اليكم هذه القصيده للشاعر عبد الحسين الحلفي من محافضه البصره الفيحاء
عجل ليش كلهه الوادم اتصيح
وليش السانه الهلكلمه ملهوف
باب السانه يالمهدي مقفول
وكلمه عجل اتطلعنه الحروف
يالمهدي وصلنه الحال مو حال
علينه اركاب كامت تسحب سيوف
بنهر الموت نسبح ليل ونهار
ونباوع يمهدي ومامش جروف
درس الموت عدنه صار منهاج
الراسب والنجح بالجفن ملفوف
يالمهدي المساجد كامت اتخاف
وصلاه الخوف ماتكمل من الخوف
ادخلوها بسلام امنين....
شمانكتب القطعه اتطيح الحروف
منو المسؤول حتى يلم الحروف
ومنو المسؤول عن دمعات الايتام
كبل هندام زيتوني يلبسون
هسه باللحايه ابغير هندام
اباوع عالوجوه الفتشوني
همه الفتشوني بزمن صدام
من ادور الارض كالونه ايصير
نهار وليل وتتكون الايام
بس عدنه الليل يبدي من الصبح ليل
معقوله الارض دورتهه اوهام
ومدام الليل يبدي من الصبح ليل
شماننتخب حارس لازم اينام
ولو عدنه اكو نيام واعين
بس ياحيف اكو واعين نيام
وعدنه اسلام اكو بس ماكو مسلمين
وعدنه اشكد مسيح وجنهم اسلام
وعدنه بهالوطن قله اليصومون
بس العوز خله اهواي صيام
حربنه وي الزمن ننطي الوجه وين
شمانلبد وراه انصير كدام
ومايهم لو جثث فوك الثره انطيح
كلشي ولاتطيح ويانه الاعلام
ونصفك للي يكطعون بالروس
ومن يوصل سرانه انصيح ضلام
وكبل صدام واحد يكطع الروس
هسه الروس صارت كلهه صدام
نلتم ننجع بس ماكو تغيير
النتيجه هم صفر تكرهنه الارقام
واخاف ايمر علينه بهالوكت يوم
طيور الحب علينه تسحب اقسام
مع حبي لكل المشاهدين اتمنى ان تعجبكم
الحارث الشويلي
الجمعة أغسطس 15, 2008 12:13 pm
