خل نزرع ورد كدام بيت الموت
ونوكف الصبح كدام عين الليل
ونكله انتهت ماعنده كلشي وياك
حمد مات وبعد ميهمنه صوت الريل
موكافي العمر خلص شتات وخوف
والثارات جيل ايتاني ثار الجيل
وخلصنه العمر عيسى انصلب لو مات
والف عيسى انصلب جي قدس الانجيل
نصبوا بالشوارع للقتل لوحات
بلوان شكثر صار القتل تشكيل
جوه اشفافنه ماتطلع الضحكات
بس عدنه الدمع ينهد مهد السيل
هابيل العراق الوحده بين الناس
لكن بالمقابل ميت الف قابيل
ساكت ياعراق وسكتتك جندوب
تبقى الراس انته وماتصير الذيل
وشيباتك فشل يالعمرك التاريخ
يصدق علينه ابرهه ابجيت الفيل
ولمريكا اشعجب تقبل تدنك الراس
وابيت النبوه اتكعد اسرائيل
ظهرك جان امس بي جرح لوجرحين
هسه من الخناجر مو ظهر غربيل
مذابح بينه وكل العرب شمات
ويصدرون الفتن من صفحة اطريبيل
فديناه بكبش صح امس بس اليوم
انذبح كل الشعب ماعافوا اسماعيل
رد لمنه ابعباتك كافي مطشرين
خنعوف السبب ميفيدنه التعليل
زعلانه الرمادي اعله النجف موعيب
والبصره انتهت ماتحجي وي اربيل
ماقدمنه ورده ابفرحه لو بالعيد
وعله ابيوت المكابر ينهده الاكليل
الفرات ودجله عشره وهسه مختلفات
ومنتظرين بلكي ايحن علينه النيل
خنعوف التفرق نترك الثارات
ونرجع من صدك موبس حجي وتمثيل
والثورات ترجع والضمير ايعود
وكلنه انصير واحد والكراسي اتميل
خاطر تنتهي ونذبح ظلام الليل
وترد تطلع شمس ونكسر القنديل
للمبدع علي الملا الخزاعي
تحياتي للجميع
الحارث الشويلي
الأحد أغسطس 24, 2008 2:32 pm
عاااشت ايدك حبي قصيده كلش رائعه وتخبل 
بس اكو جمله ما افتهمته ممكن تشرحه (ونوكف الصبح كدام عين الليل) 
تقبل مروري 
تحياااااااااااااااااااااااااااااتي