جرح السيف يرحل مايظل للدوم
مثل وكت الفجر من ترحل الظلمه
لچن الجرح يبقه وما يطيب سنين
أذا واحد حنين وينجرح بمه
فرق بين الي يزرع عالوجه دمعات
وبين الي زرع فوگ الوجه بسمه
مثل واحد ينزلك جوه عقر الگاع
اواحد يرفعك ويصعدك القمه
الطعن باصحابه يمك لا تأمن بي
تره يمهم يطعنك وانته مو يمه
ولا تمشي بدرب ما داسته الرجلين
لأن هذا الدرب بس ربك يعلمه
أكو السانه ذهب وگليبه شايل غيض
فارجع للگلب لدغرك الكلمه
هذاك امبين الي جرح يداوي
ومبين هذاك الجرحك يلچمه
واذا چفك خشب لتقربه يم النار
تره يصبح رماد ويختفي بنسمه
واذا سجنك ظلم عالدنيه لا تعتب
أعتب عالقضاء واشكل الذمه
واذا بيتك خرب ما غيرك المسؤل
لأن واجب عليك المخطء اتعلمه
واذا رت الصبر أنضر لبو السجاد
يناجي الله رغم مخضب بدمه
واذا رت الوفه أنضر ألى العباس
منه چفوفه طاحن لجل ابو اليمه
واذا ظاگت صدگ لا تطلب امن الناس
أبو الحسنين يمك صاحب الهمه
الشاعر
احسان القريشي
تحياتي
الحارث الشويلي
الأحد أغسطس 31, 2008 7:16 am
تقبل مروري